मतदार यादीत चुका, दुबार नावे, शिवसेना नेत्यांनी मनपा आयुक्तांची भेट घेऊन दिले निवेदन...

मतदार यादीतील दुबार नावे व घोळ दुर करण्याची शिवसेनेची मागणी, घेतली आयुक्तांची भेट...

छत्रपती संभाजीनगर (औरंगाबाद), दि.26(डि-24 न्यूज)- महानगरपालिकेच्या मतदार याद्यांमध्ये मोठ्या प्रमाणात झालेल्या गंभीर चुका, गोंधळ आणि अनियमिततेविरोधात शिवसेनेने आज निवडणूक प्रशासनाकडे औपचारिक निवेदन सादर करून तात्काळ कारवाईची मागणी केली आहे. मनपा आयुक्त जी श्रीकांत यांची शिवसेना नेत्यांनी भेट घेऊन निवेदन दिले.

निवेदनात असे नमूद करण्यात आले आहे की, एका प्रभागातील हजारों मतदारांची नावे कोणत्याही योग्य कारणांशिवाय इतर प्रभागांमध्ये हलविण्यात आली आहेत. काही मतदारांची नावे, पत्ते आणि प्रभाग क्रमांक चुकीचे नोंदवले गेले असून काही ठिकाणी एकाच व्यक्तीचे नाव दोन वेगवेगळ्या प्रभागांत दिसत आहे. तर काही मतदारांची नावे संपूर्णपणे यादीतून गहाळ झाली आहेत.

शिवसेनेने निवेदनात उल्लेख केला की, 2024 च्या विधानसभा निवडणुकांदरम्यान चुकीची नोंद, दुबार (duplicate) मतदार, मृत व्यक्तींची नावे यादीत राहणे अशा अनेक त्रुटींची नोंद झाली होती. निवडणूक आयोगाच्या मार्गदर्शक सूचनांनुसार बीएलओंनी योग्य तपासणी करून अचूक मतदार यादी तयार करणे अपेक्षित होते. मात्र, प्रत्यक्षात मतदार याद्यांमध्ये मोठ्या प्रमाणात चुका झाल्याचे दिसून येत असल्याचे शिवसेनेने म्हटले आहे.

या गंभीर परिस्थितीमुळे निवडणूक प्रक्रियेवरील जनतेचा विश्वास कमी होत असून प्रशासनातील हलगर्जीपणा उघड होत असल्याचा आरोपही करण्यात आला आहे.

शिवसेनेच्या प्रमुख मागण्या...

सर्व प्रभागांतील मतदार याद्यांची तत्काळ पुनर्तपासणी करावी.

चुकीने दुसऱ्या प्रभागात टाकलेले सर्व मतदार मूळ प्रभाग यादीत समाविष्ट करावेत.

मतदारांना योग्य ती माहिती देण्यासाठी विशेष मदत केंद्रे सुरू करावीत.

मतदार यादी तयार करताना झालेल्या चुका आणि हलगर्जीपणाबद्दल संबंधित अधिकाऱ्यांवर कठोर कारवाई करावी.

सुधारीत व शुद्ध मतदार यादी सार्वजनिकरित्या पुन्हा प्रसिद्ध करावी.

निवेदनावर शिवसेनेचे जिल्हा, महानगर आणि विविध प्रभागातील पदाधिकाऱ्यांनी स्वाक्षऱ्या करून या मुद्द्यांची तात्काळ दखल घेण्याची मागणी केली आहे. निवेदनात असेही नमूद करण्यात आले आहे की, जर ही मागणी मान्य झाली नाही तर तीव्र आंदोलनाचा इशारा देण्यात आला आहे. शिवसेना उबाठाच्या नेत्यांनी मनपा आयुक्तांची भेट घेऊन निवेदन दिले.

याप्रसंगी शिवसेना नेते अंबादास दानवे, शिवसेना नेते चंद्रकांत खैरे, महानगरप्रमुख राजू वैद्य, शहर प्रमुख बाळासाहेब थोरात, शहर प्रमुख हरिभाऊ हिवाळे, सह संपर्क प्रमुख विजयराव साळवे, शहर प्रमुख दिग्विजय शेरखाने, संघटक सुनीता आऊलवार, अनिता मंत्री, सुनीता देव, दुर्गा भाटी, आशा दातार, सुकन्या भोसले, मिना फसाटे आदी उपस्थित होते.