धार्मिक स्थळ वाचवत पडेगावात 55 मालमत्ता भुईसपाट, यानंतर हर्सुल येथे कार्यवाई...

पडेगाव मिस्बाह काॅलनी मुख्य रस्ता ते गोल्फ कोर्स रस्त्याचा श्वास मोकळा...

55 मालमत्तांची पाडापाडी...एका नागरिकाने स्वत:ची जागा दिल्याने धार्मिकस्थळ वाचले...

छत्रपती संभाजीनगर (औरंगाबाद), दि.26(डि-24 न्यूज)- पडेगावमधील मिस्बाह काॅलनी मुख्य रस्ता ते एमजीएम गोल्फ क्लबकडे जाणाऱ्या 500 मीटर लांबीच्या रस्त्यासाठी बाधित ठरणाऱ्या 55 मालमत्ता बुधवारी महापालिकेच्या पथकाने पाडून जागा मोकळी केली. मुख्य रस्त्यालगत असलेली मस्जिद आणि मदरसाही बाधित होत होता, हाजी रऊफ यांनी त्यांच्या मालकीची जागा दिल्याने, धार्मिकस्थळ आणि मदरशावरील कारवाई टळली. आता या दोन्ही जागांना धक्का न लावता, रस्ता करण्यात येणार आहे. अशी माहिती अतिक्रमण विभागाचे सनियंत्रण अधिकारी संतोष वाहुळे यांनी दिली. त्यांनी पुढे सांगितले यानंतर हर्सुल व चंपा चौक ते जालना रोडपर्यंत कार्यवाई करण्यात येणार आहे.

मिस्बाह कॉलनीतील गोल्फ कोर्समार्गे कासंबरी दर्गा, महापालिकेचा कत्तलखाना असा 24 मीटरचा रस्ता यापूर्वीच्या विकास आराखड्यात मंजूर आहे. हा रस्ता पुढे भावसिंगपुऱ्याकडे जाणाऱ्या 24 मीटर रस्त्याला जोडणार आहे. या रस्त्यासाठी महापालिकेने 2013 मध्ये 24 मीटर रस्त्यासाठी भूसंपादन केलेले आहे. त्यासाठी जमीन मालकांना टीडीआर स्वरुपात मोबदलाही दिलेला आहे. मनपा आयुक्त तथा प्रशासक जी श्रीकांत यांनी नवीन विकास आराखड्यानुसार मंजूर 30 मीटर रुंद असा हा रस्ता करण्याचा निर्णय घेतला. त्यासाठी मनपाच्या पथकाने मार्किंग करून बाधित मालमत्ता काढून घेण्याचे आवाहन केले होते. येथील बाधित नागरीकांनी आपल्या मालमत्ता स्वतः काढून घेतल्या त्यांचे सहकार्य मिळाले. राहिलेल्या काही मालमत्तांवर आज मनपाचा बुलडोझर चालला. शांततेत हि कार्यवाही पोलिस बंदोबस्तात करण्यात आली. 21 नोव्हेंबर रोजी नागरिकांनी 90 टक्के बाधित मालमत्ता स्वत:हून काढून घेतल्या. तर मंगळवारी काही नागरिकांनी नगर रचना विभागाचे उपसंचालक मनोज गर्जे यांची भेट घेत टीडीआरचा मुद्दा उपस्थित केला. टीडीआर देवून ताब्यात घेतलेली 24 मीटरची जागा आणि उर्वरीत 6 मीटरसाठी दोन्ही बाजूंनी 3-3 मीटर जागा घेण्याची मागणी केली. बुधवारी पथक थेट जेसीबी, टिप्पर व फौजफाटा घेवून धडकले. नागरिकांनी अर्धवट पाडलेले बांधकाम पूर्णपणे पाडून जागा मोकळी करून घेतली. ही कारवाई अतिक्रमण विभागाचे सनियंत्रण अधिकारी संतोष वाहुळे, नगररचना विभागाचे उपसंचालक मनोज गर्जे, उपअभियंता कौस्तूभ भावे, नगरचनाकार राहूल मालखेडे, झोन एकच्या सहायक आयुक्त सविता सोनवणे, अतिक्रमण विभागाचे संजय सुरडकर, नागरी मित्र पथकप्रमुख प्रमोद जाधव यांच्यासह पथकाने केली. आता मुख्य रस्ता ते मिस्बाह कॉलनी ते एमजीएमच्या गोल्फ क्लबपर्यंत 500 मिटर लांबीचा 30 मीटर रुंद असा रस्ता लवकरच तयार केला जाणार आहे.     

महापालिकेचे आयुक्त तथा प्रशासक जी श्रीकांत यांनी मागील महिन्यात मिस्बाह कॉलनीतील नागरिकांशी संवाद साधला होता. जागा देणार असाल तर मस्जिद वाचविण्याचा प्रयत्न करू असे आश्वासन दिले होते. बुधवारी कारवाईदरम्यान नागरिकांनी मस्जिद स्थळासमोरी जमीन मालक हाजी रऊफ यांच्याशी चर्चा केली. रस्त्यात धार्मिक स्थळ 9 मीटर बाधित होत आहे तसेच 24 मीटरचा रस्ता आता 30 मीटरचा झाल्याने उर्वरीत 6 मीटर जागा अशी एकूण 15 मीटर जागा देण्याचे हाजी रऊफ यांनी लेखी दिले, त्यामुळे मस्जिदला धक्का न लावता समोरिल जागेतून रस्ता करण्यात येईल असे सनियंत्रण अधिकारी संतोष वाहुळे यांनी सांगितले.

ग्रीन झोनवर प्लॉटिंग काढल्याने मालमत्ता बाधित...

सन 1991 मध्ये हा परिसर ग्रीन झोनमध्ये समाविष्ट केलेला आहे, त्यामुळे या जमीनीवर उद्यानाचे आरक्षण टाकण्यात आलेले आहे. असे असतानाही, भूमाफियांनी या भागात अनधिकृतपणे प्लॉटींग करून त्याची विक्री केली. अनेकांनी प्लॉटवर बांधकाम करून घर उभारले. सन 2025 च्या मंजूर विकास आराखड्यामध्ये ही जमीन यलो झाली. परंतु, उद्यानाचे आरक्षण उठविण्यासाठी आक्षेप दाखल झालेले आहेत. सध्या त्यावर राज्य शासनास्तरावर निर्णय प्रलंबित आहे. त्यामुळे यलो झोनला मंजूरी नाही ही बाबही यावेळी अधिकाऱ्यांनी मालमत्ताधारकांच्या निदर्शनास आणून

दिली.