सतीश चव्हाण यांच्या समोर एम.के.देशमुख यांचे आव्हान, उद्या शक्ती प्रदर्शन करत उमेदवारी अर्ज दाखल करणार...!

सतीश चव्हाण यांच्यासमोर एम.के. देशमुख यांचे आव्हान; उद्या शक्तिप्रदर्शन करत अपक्ष उमेदवारी अर्ज दाखल करणार!

छत्रपती संभाजीनगर (औरंगाबाद), दि. 5 (डी-24 न्यूज)- मराठवाडा पदवीधर मतदारसंघाच्या निवडणुकीत आता राजकीय रंगत वाढण्याची शक्यता निर्माण झाली आहे. महायुतीकडून सतीश चव्हाण यांची उमेदवारी निश्चित झाल्यानंतर आता माजी शिक्षणाधिकारी एम.के. देशमुख हे अपक्ष उमेदवारी अर्ज दाखल करणार असल्याची माहिती समोर आली आहे. त्यामुळे पदवीधर मतदारसंघातील राजकीय समीकरणांमध्ये आणखी एक महत्त्वाची घडामोड झाली आहे.

गेल्या विधानसभा निवडणुकीत औरंगाबाद पूर्व मतदारसंघातून काँग्रेसने माजी शिक्षणाधिकारी एम.के. देशमुख यांना उमेदवारी जाहीर केली होती. देशमुख यांनी मोठ्या तयारीने राजकारणात प्रवेश केला होता. त्यावेळी भाजपचे अतुल सावे यांच्याविरोधात देशमुख यांच्यामुळे निवडणुकीत चुरस निर्माण होण्याची चर्चा होती. मात्र, ऐनवेळी काँग्रेसने त्यांची उमेदवारी बदलून लहू शेवाळे यांना मैदानात उतरवले.

त्यानंतर एम.के. देशमुख यांनी भाजपमध्ये प्रवेश केला. मराठवाडा पदवीधर मतदारसंघातून निवडणूक लढविण्यासाठी ते इच्छुक असल्याची चर्चा होती. मात्र, महायुतीकडून सतीश चव्हाण यांना उमेदवारी मिळाल्यानंतर देशमुख यांनी अपक्ष म्हणून मैदानात उतरण्याचा निर्णय घेतल्याचे सांगितले जात आहे. देशमुख यांच्या भाजप प्रवेशानंतरच मराठवाडा पदवीधर मतदारसंघाच्या निवडणुकीत त्यांच्या नावाची चर्चा सुरू झाली होती.

उद्या शक्तिप्रदर्शन करत अर्ज दाखल करणार

उमेदवारी अर्ज दाखल करण्याच्या शेवटच्या दिवशी, उद्या एम.के. देशमुख हे आपल्या समर्थकांसह शक्तिप्रदर्शन करत अपक्ष उमेदवारी अर्ज दाखल करणार आहेत. सिडको येथील त्यांच्या संपर्क कार्यालयातून दुपारी 1 वाजता समर्थकांसह निघून ते उमेदवारी अर्ज दाखल करणार असल्याची माहिती देशमुख यांनी दिली आहे.

मराठवाड्यातील पदवीधर मतदारांमध्ये आपला जनसंपर्क असल्याचा दावा देशमुख समर्थकांकडून केला जात आहे. या पार्श्वभूमीवर त्यांच्या उमेदवारीकडे आता राजकीय वर्तुळाचे लक्ष लागले आहे.

निवडणुकीतील समीकरणांवर परिणाम?

सतीश चव्हाण हे मराठवाडा पदवीधर मतदारसंघाचे सलग तीन टर्म प्रतिनिधित्व करत आले आहेत. 2020 च्या निवडणुकीत त्यांनी 1 लाख 16 हजार 638 मते मिळवत विजय मिळवला होता.

आता एम.के. देशमुख यांनी अपक्ष म्हणून उमेदवारी अर्ज दाखल केल्यास पदवीधर मतदारसंघातील निवडणुकीत आणखी एक महत्त्वाचा उमेदवार मैदानात येणार आहे. देशमुख हे निवडणुकीच्या मैदानात शेवटपर्यंत कायम राहतात का आणि त्यांच्या उमेदवारीचा एकूण निवडणूक समीकरणांवर काय परिणाम होतो, याकडे मराठवाड्याचे लक्ष लागले आहे.