खुलताबाद निवडणूक तयारीचा आढावा, मतदारांनी आपला मतदानाचा हक्क बजवावा - जिल्हाधिकारी दिलीप स्वामी

खुलताबाद न.पा.येथील निवडणूक तयारीचा आढावा

मतदारांनी आपला हक्क बजवावा- जिल्हाधिकारी दिलीप स्वामी

छत्रपती संभाजीनगर (औरंगाबाद), दि.27(डि-24 न्यूज)- नगरपरिषद सार्वत्रिक निवडणुकीसाठी 2 डिसेंबर रोजी मतदान होणार आहे. यासाठी प्रशासनातर्फे मतदार जनजागृती करण्यात येत आहे. मतदारांनी आपला मतदानाचा हक्क बजवावा,असे आवाहन जिल्हाधिकारी दिलीप स्वामी यांनी आज खुलताबाद येथे केले.

 जिल्हाधिकारी दिलीप स्वामी यांनी आज खुलताबाद नगरपरिषद कार्यालयात निवडणूक कामांचा आढावा घेतला. उपविभागीय अधिकारी संतोष गोरड, निवडणूक निर्णय अधिकारी स्वरूप कंकाळ, मुख्याधिकारी शेख समीर, सहाय्यक पोलीस अधीक्षक अपराजीता अग्निहोत्री, पोलीस निरीक्षक धनंजय फराटे, गटशिक्षणाधिकारी विलास केवट, प्रमोद सावंत, अविनाश निळेकर, सुभाष पांढरे, अनिल भगत, रुस्तुम फुलारे, अंकुश भराड, जितेंद्र बोचरे, शुभम देवकर आदी उपस्थित होते.

 बैठकीत माहिती देण्यात आली की, नगरपालिका निवडणुकीच्या पार्श्वभूमीवर खुलताबाद शहरातील 25 जणांवर प्रतिबंधात्मक कार्यवाही करण्यात आली आहे. मतदारांसाठी आरोग्य शिबीर आयोजित करण्यात आले आहे. गोपनीय माहिती घेतली जात आहे. कायदा व सुव्यवस्थेचा प्रश्न निर्माण होऊ नये यासाठी प्रशासनाने काळजी घेत आहे. सर्व राजकीय पक्षांनी उमेदवारांनी आचारसंहितेचे पालन करावे यासाठी प्रशासन सतर्क आह्रे. निवडणूक प्रक्रिया शांततेत व निर्भय वातावरणात पार पाडण्यासाठी प्रशासकीय यंत्रणा सज्ज आहे. 

मतदान जनजागृतीसाठी फलक...

प्रशासनाकडून ‘मी मतदान करणारच’ हा फलक लावण्यात आला आहे. मी मतदान करणारच… इतरांनाही सांगणार, ‘आपणही आपल्या मतदानासाठी सज्ज रहा’ असे सांगत नगरपरिषद कार्यालयात लावलेल्या फलकावर मतदारांनी स्वाक्षरी करण्याचे आवाहन जिल्हाधिकारी दिलीप स्वामी यांनी केले आहे. विविध होर्डिंग्ज, बॅनर्स, पोस्टर्स आणि जिंगल्सच्या माध्यमातून मतदार जनजागृती करण्यात येत असून प्रशासनाच्या विविध विभागांच्या समाज माध्यम खात्यावरूनही मतदार जनजागृतीची मोहीम राबविण्यात येत असल्याचे जिल्हाधिकाऱ्यांनी सांगितले. मतदानाची टक्केवारी वाढविण्यासाठी प्रयत्न सुरू आहेत, असे जिल्हाधिकारी दिलीप स्वामी यांनी सांगितले. 

मतदान केंद्राची पाहणी...

जिल्हाधिकारी दिलीप स्वामी यांनी शहरातील विविध मतदान केंद्रांची पाहणी केली. खुलताबाद नगरपरिषद सार्वत्रिक निवडणुकीसाठी शहरात 19 मतदान केंद्रे कार्यान्वित करण्यात आली आहेत. खुलताबाद नगरपरिषदेत 14 हजार 775 मतदार मतदानाचा हक्क बजावणार आहेत. 19 मतदान केंद्रांवर मूलभूत सुविधा उपलब्ध करून देण्याच्या दृष्टीने विशेष काळजी घेत असल्याचे यावेळी जिल्हाधिकारी स्वामी यांनी सांगितले.