घरातून पळून गेलेल्या युवतीला रेल्वे आरपीएफने केले कुटुंबाच्या स्वाधीन...

घरातून पळून गेलेल्या युवतीला सुखरूप आरपीएफने केले कुटुंबाच्या स्वाधीन...

“ऑपरेशन डिग्निटी अंतर्गत प्रवाशांची सुरक्षा व सन्मान सुनिश्चित करत आरपीएफचे उल्लेखनीय कार्य”

नांदेड, दि.28(डि-24 न्यूज)-

दक्षिण मध्य रेल्वेच्या नांदेड मंडळात रेल्वे सुरक्षा बल (RPF) द्वारे प्रवाशांच्या सुरक्षा व सहाय्यासाठी सातत्याने दक्षता ठेवून उल्लेखनीय कार्य केले जात आहे. त्याच अनुषंगाने ऑपरेशन डिग्निटी अंतर्गत विविध ठिकाणी प्रभावी कारवाई करून गरजू प्रवाशांना सुरक्षित मदत पुरविण्यात आली.

दिनांक 27.03.2026 रोजी सुमारे 14:30 वाजता, पुर्णा रेल्वे स्थानकावर ड्युटीवर असलेल्या महिला कॉन्स्टेबल श्रीमती गुड्डीबाई मीणा यांना एका व्यक्तीकडून माहिती मिळाली की एक युवती घरातून पळून येऊन स्थानकावर आली आहे. माहिती मिळताच महिला कॉन्स्टेबल यांनी प्लॅटफॉर्म क्रमांक 1 वरून संबंधित युवतीला सुरक्षितपणे आरपीएफ पोस्ट, पुर्णा येथे आणले व प्राथमिक चौकशी केली.

चौकशीदरम्यान युवतीने आपले नाव सांगितले तसेच ती जोगेश्वरी ईस्ट, मुंबई येथील रहिवासी असल्याचे सांगितले. या प्रकरणाची माहिती तत्काळ संबंधित अधिकाऱ्यांना देण्यात आली. त्यानंतर युवतीला वैद्यकीय तपासणीसाठी शासकीय रुग्णालय, पुर्णा येथे पाठविण्यात आले व वैद्यकीय फिटनेस प्रमाणपत्र प्राप्त करण्यात आले. त्यानंतर तिला सुरक्षितपणे सखी वन स्टॉप सेंटर, परभणी यांच्या स्वाधीन करण्यात आले असून पुढील आवश्यक काळजी व कार्यवाही तेथे करण्यात येणार आहे.

याचप्रमाणे, 27.03.2026 रोजीच, आरपीएफला अशी माहिती मिळाली की बठिंडा, पंजाब येथील एक महिला मानसिक तणावामुळे हजूर साहिब नांदेड रेल्वे स्थानकावरून बेपत्ता झाली असून ती ट्रेन क्रमांक 16593 (बेंगळुरू–नांदेड एक्सप्रेस) ने प्रवास करत आहे.

माहितीच्या आधारे परभणी रेल्वे स्थानकावर ड्युटीवर असलेले हेड कॉन्स्टेबल श्री अविनाश पाटील व महिला कॉन्स्टेबल श्रीमती मुक्ता भिसे यांनी ट्रेन आगमनानंतर सखोल शोध घेतला. या दरम्यान संबंधित महिला ट्रेनच्या एका डब्यात सुरक्षित अवस्थेत आढळून आली. त्यानंतर त्यांना आरपीएफ पोस्ट, परभणी येथे आणून आवश्यक चौकशी करण्यात आली तसेच त्यांच्या पतींशी (रहिवासी बठिंडा, पंजाब) संपर्क साधून त्यांना बोलाविण्यात आले. सर्व औपचारिकता पूर्ण केल्यानंतर संबंधित महिलेला त्यांच्या पतींच्या स्वाधीन करण्यात आले.

याशिवाय प्रवाशांना फसवणूक व बेकायदेशीर कारवायांपासून संरक्षण देण्यासाठी आरपीएफकडून ऑपरेशन उपलब्ध अंतर्गतही कठोर कारवाई करण्यात आली. 27.03.2026 रोजी, विश्वसनीय माहितीच्या आधारे मुकुंदवाडी रेल्वे स्थानकाच्या आरक्षण काउंटरवर आरपीएफच्या संयुक्त पथकाने गुप्त नजर ठेवली. या कारवाईदरम्यान दोन दलालांना तत्काळ आरक्षण तिकिटांची बेकायदेशीर विक्री करताना पकडण्यात आले.

आरोपींच्या ताब्यातून चार प्रवाशांसाठी स्लीपर क्लासचे तत्काळ तिकीट (मूल्य ₹3,760) जप्त करण्यात आले. चौकशीदरम्यान त्यांनी प्रत्येक प्रवाशाकडून ₹200 अतिरिक्त रक्कम घेऊन तिकिटांची बेकायदेशीर विक्री केल्याची कबुली दिली. आवश्यक कायदेशीर कारवाई करत दोन्ही आरोपींविरुद्ध रेल्वे अधिनियमाच्या कलम 143 अंतर्गत गुन्हा दाखल करण्यात आला आहे.

नांदेड मंडळात आरपीएफद्वारे करण्यात आलेल्या या कारवायांमधून हे स्पष्ट होते की रेल्वे सुरक्षा बल प्रवाशांची सुरक्षा, मदत आणि रेल्वे परिसरातील बेकायदेशीर कारवायांवर आळा घालण्यासाठी पूर्णपणे कटिबद्ध आहे. आरपीएफच्या तात्काळ व संवेदनशील कारवाईबद्दल प्रवाशांनीही समाधा

न व्यक्त केले आहे.