मार्टी कृती समीतीच्या संघर्षाला यश...! मार्टी संस्थेच्या नोंदणीसह संचालक मंडळाला शासनाची मान्यता...

मार्टी कृती समितीच्या संघर्षाला यश!

‘मार्टी’ संस्थेच्या नोंदणीसह संचालक मंडळाला शासनाची मान्यता

छत्रपती संभाजीनगर (औरंगाबाद), दि. 2 (डि-24 न्यूज) – अल्पसंख्याक संशोधन व प्रशिक्षण संस्था अर्थात ‘मार्टी’ (MARTI) कार्यान्वित करण्यासाठी मार्टी कृती समितीच्या वतीने गेल्या काही काळापासून सुरू असलेल्या सातत्यपूर्ण संघर्षाला अखेर मोठे यश मिळाले आहे. महाराष्ट्र शासनाच्या अल्पसंख्याक विकास विभागाने 31 ऑगस्ट 2026 रोजी शासन निर्णय (GR) जारी करून ‘मार्टी’ संस्थेची कंपनी कायदा, 2013 अंतर्गत नोंदणी करण्यास तसेच प्रथम संचालक मंडळाच्या नियुक्तीस मान्यता दिली आहे.

कंपनी कायद्यानुसार होणार नोंदणी

शासन निर्णयानुसार कंपनी कायदा, 2013 मधील नियम 8 अन्वये ‘मार्टी’ संस्थेची अधिकृत नोंदणी करण्यात येणार आहे. संस्थेच्या नोंदणीसाठी आवश्यक असलेले दस्तऐवजीकरण आणि प्रशासकीय प्रक्रिया पूर्ण करण्यासाठी सल्लागार शेख यांना प्राधिकृत करण्यात आले आहे.

संचालक मंडळाची नियुक्ती

‘मार्टी’च्या प्रथम संचालक मंडळात उपमुख्यमंत्री सुनेत्रा पवार यांची अध्यक्षपदी, तर राज्यमंत्री माधुरी मिसाळ यांची उपाध्यक्षपदी नियुक्ती करण्यात आली आहे. शासनाच्या या निर्णयामुळे संस्थेच्या प्रत्यक्ष कार्यान्वित होण्याचा मार्ग मोकळा झाला आहे.

अल्पसंख्याक समाजातील विद्यार्थ्यांना मोठा फायदा

‘मार्टी’च्या माध्यमातून अल्पसंख्याक समाजातील विद्यार्थी, युवक-युवती आणि संशोधकांना विविध शैक्षणिक व रोजगाराभिमुख संधी उपलब्ध होण्याची अपेक्षा आहे.

फेलोशिप व उच्च शिक्षण : बार्टी, सारथी आणि महाज्योतीच्या धर्तीवर अल्पसंख्याक समाजातील एम.फिल. आणि पीएच.डी. करणाऱ्या संशोधक विद्यार्थ्यांसाठी स्वतंत्र फेलोशिप सुरू करण्याचा मार्ग मोकळा होणार आहे.

स्पर्धा परीक्षांचे प्रशिक्षण : UPSC, MPSC, बँकिंगसह विविध स्पर्धा परीक्षांसाठी अल्पसंख्याक युवक-युवतींना मोफत निवासी प्रशिक्षण तसेच विद्यावेतन उपलब्ध करून देण्याची संधी निर्माण होणार आहे.

कौशल्य विकास व रोजगार : विविध व्यावसायिक व तांत्रिक अभ्यासक्रमांच्या माध्यमातून युवकांना कौशल्य प्रशिक्षण देऊन स्वयंरोजगार आणि रोजगाराच्या संधी उपलब्ध करून देण्यास मदत होणार आहे.

संशोधन व शैक्षणिक धोरण : अल्पसंख्याक समाजाच्या सामाजिक, शैक्षणिक आणि आर्थिक विकासासाठी शास्त्रोक्त पद्धतीने संशोधन करून त्याआधारे शासनाच्या माध्यमातून विविध कल्याणकारी योजना राबविण्यास मदत होणार आहे.

छत्रपती संभाजीनगरमध्ये मुख्यालयासाठी पाठपुरावा

‘मार्टी’चे मुख्य कार्यालय छत्रपती संभाजीनगर येथे राहणार असून, मार्टी कृती समिती महाराष्ट्रचे मुख्यालयही छत्रपती संभाजीनगर येथेच असल्याचे समितीच्या पदाधिकाऱ्यांनी सांगितले. त्यामुळे राज्यातील अल्पसंख्याक समाजाच्या विविध समस्या शासनापर्यंत थेट पोहोचविण्यासाठी समितीच्या माध्यमातून सातत्याने पाठपुरावा करण्यात येणार आहे.

मार्टीच्या माध्यमातून प्रत्यक्ष योजनांचा लाभ विद्यार्थ्यांना मिळेपर्यंत समितीचा संघर्ष आणि पाठपुरावा सुरूच राहणार असल्याचे पदाधिकाऱ्यांनी स्पष्ट केले.

समस्या समितीपर्यंत पोहोचविण्याचे आवाहन

अल्पसंख्याक समाजाच्या हितासाठी शहर, विभाग आणि प्रांतीय स्तरावरील शैक्षणिक, सामाजिक तसेच इतर समस्या मार्टी कृती समितीपर्यंत पोहोचवाव्यात. संबंधित समस्यांचे शासनस्तरावर प्रतिनिधित्व करून त्यावर मार्ग काढण्यासाठी समिती सदैव तत्पर राहील, असे आवाहन मार्टी कृती समितीचे अध्यक्ष अॅड अझर पठाण, सर आसिफ यांनी केले आहे.

मार्टीच्या प्रत्यक्ष योजनांना सुरुवात होऊन त्याचा लाभ विद्यार्थ्यांपर्यंत पोहोचणे ही पुढील महत्त्वाची पायरी ठरणार आहे.