शहरात आज रविवारी मौलाना उमरैन महफूज रहेमानी यांचे विशेष व्याख्यान...!

नशेचे व्यसन व वाढत्या गुन्हेगारीच्या पार्श्वभूमीवर नागरिकांच्या जबाबदारीवर विशेष व्याख्यान

छत्रपती संभाजीनगर (औरंगाबाद), दि.22 (डि-24 न्यूज) : शहरात वाढत असलेले नशेचे व्यसन आणि त्यातून निर्माण होणाऱ्या गुन्हेगारीच्या समस्येविरोधात जनजागृती करण्यासाठी तसेच सामूहिक प्रयत्नांना बळ देण्यासाठी ‘Alliance Against Crime’ या व्यासपीठाच्या वतीने विशेष जनजागृती कार्यक्रमाचे आयोजन करण्यात आले आहे.

या कार्यक्रमात प्रसिद्ध युवा इस्लामी विद्वान तथा ऑल इंडिया मुस्लिम पर्सनल लॉ बोर्डाचे सदस्य मौलाना उमरैन महफूज रहमानी यांचे विशेष मार्गदर्शनपर व्याख्यान होणार आहे. ‘नशेचे व्यसन व वाढत्या गुन्हेगारीचा कल आणि नागरिकांची जबाबदारी’ या विषयावर ते मार्गदर्शन करणार आहेत.

हा कार्यक्रम रविवार, दि. 23 ऑगस्ट रोजी सायंकाळी 5.30 वाजता औलिया मस्जिद, रोजाबाग येथे आयोजित करण्यात आला आहे.

शहराला गुन्हेमुक्त आणि सुरक्षित बनविण्याच्या उद्देशाने विविध सामाजिक संस्था, संघटना तसेच जागरूक नागरिकांना एकत्र आणून ‘Alliance Against Crime’ या संयुक्त व्यासपीठाची निर्मिती करण्यात आली आहे. या माध्यमातून नशा आणि गुन्हेगारीविरोधात जनजागृती करण्यासोबतच प्रत्यक्ष सामाजिक कृतीवरही भर दिला जात आहे.

या अभियानांतर्गत शहरातील विविध भागांमध्ये कॉर्नर मीटिंग्स घेणे, पोलीस प्रशासन व महानगरपालिका प्रशासनाशी समन्वय साधणे, तसेच नशेच्या व्यसनातून मुक्त होण्यासाठी मानसोपचार तज्ज्ञ आणि डी-अॅडिक्शन क्षेत्रातील तज्ज्ञांचे सहकार्य घेण्याचे प्रयत्न सुरू आहेत.

याशिवाय शैक्षणिक संस्था आणि विद्यार्थ्यांनाही या अभियानाशी जोडण्याचे नियोजन करण्यात येत असून, युवा पिढीला नशेचे व्यसन, गुन्हेगारी आणि त्याचे सामाजिक परिणाम याबाबत जागरूक करण्यावर भर दिला जाणार आहे.

आयोजकांच्या मते, नशा आणि गुन्हेगारीविरोधातील लढा ही केवळ पोलीस किंवा प्रशासनाची जबाबदारी नसून पालक, शिक्षक, शैक्षणिक संस्था, सामाजिक संघटना, धार्मिक नेतृत्व, युवक आणि प्रत्येक जबाबदार नागरिकाची भूमिका महत्त्वाची आहे.

सुरक्षित, शांततामय आणि गुन्हेमुक्त शहर निर्माण करण्यासाठी समाजातील सर्व घटकांनी एकत्र येऊन सातत्याने प्रयत्न करणे आवश्यक आहे. या पार्श्वभूमीवर शहरातील नागरिक, सामाजिक कार्यकर्ते, विविध संस्था, संघटना आणि युवकांनी या महत्त्वपूर्ण कार्यक्रमास मोठ्या संख्येने उपस्थित राहून सुरक्षित, शांततामय आणि गुन्हेमुक्त छत्रपती संभाजीनगरच्या निर्मितीच्या सामूहिक प्रयत्नात सहभागी व्हावे, असे आवाहन **‘Alliance Against Crime’**च्या वतीने करण्यात आले आहे.