प्रत्येक घरात संविधान पोहोचवण्यासाठी संविधानाचे दूत व्हा - डॉ.निलम गो-हे
प्रत्येक घरात संविधान पोहोचण्यासाठी संविधानाचे दूत व्हा _ डॉ. नीलम गोऱ्हे
संविधान प्रस्ताविका कोनशिलाचे दूरदृश्य प्रणालीने अनावरण
छत्रपती संभाजीनगर (औरंगाबाद), दि.26 (डि-24 न्यूज) -प्रत्येक व्यक्तीच्या हक्क आणि कर्तव्याचे रक्षण होण्यासाठी प्रत्येक घरात आणि गावात संविधान पोहोचणे आवश्यक आहे. हक्काबरोबर कर्तव्याची जाणीव करून देण्यासाठी प्रत्येकाने संविधानाचे दूत व्हावे असे आवाहन विधान परिषदेच्या उपसभापती डॉ.नीलम गोऱ्हे यांनी आज येथे केले.
किले अर्क येथील वंदे मातरम् सभागृहामध्ये संविधान दिनानिमित्त सामाजिक न्याय व विशेष सहाय्य विभाग, डॉ.बाबासाहेब आंबेडकर संशोधन व प्रशिक्षण संस्था, बार्टी यांच्या संयुक्त विद्यमाने संविधान दिनाच्या कार्यक्रमाचे आयोजन करण्यात आले होते.
या कार्यक्रमास राज्याचे सामाजिक न्याय व विशेष सहाय्य विभागाचे मंत्री तथा जिल्ह्याचे पालकमंत्री संजय शिरसाट, समाज कल्याण विभागाच्या आयुक्त दीपा मुधोळ महानगरपालिकेचे आयुक्त जी. श्रीकांत ,जात पडताळणी समितीचे अध्यक्ष महेंद्र हरपाळकर ,माजी महापौर नंदकुमार घोडेले यांच्यासह विविध शाळा, महाविद्यालयाचे विद्यार्थी या सामूहिक उद्देशिका वाचन कार्यक्रमास उपस्थित होते. संविधानाच्या उद्देशिकेच्या वाचनाचा हेतू हा प्रामुख्याने प्रत्येक व्यक्तीपर्यंत कायदे प्रभावीपणे पोहोचवणे तसेच त्याच्या हक्काचे आणि कर्तव्याची जाणीव करून देऊन समाजामध्ये समानता निर्माण व्हावी हा आहे. कोणत्याही व्यक्तीच्या हक्काला हानी पोहोचू नये याबाबतची जाणीव जागृती या संविधानाच्या माध्यमातून होते. प्रत्येकाने संविधानाने दिलेल्या कर्तव्याच्या चौकटीत राहून कायद्याचे पालन करणे आवश्यक आहे ,असे डॉ नीलम गोऱ्हे यांनी सांगितले. डॉ. बाबासाहेब आंबेडकरांनी घटना समितीच्या मसुदा समितीचे अध्यक्षपद स्वीकारून विविध देशातील राज्यघटनेचा अभ्यास केला . यातून परिपूर्ण आणि दीर्घ संविधान भारत देशाला दिलेले मोठे वरदान आहे .त्यांनी विद्वत्तेबरोबरच मुत्सद्दीपणाची भूमिका घेऊन महिला ,वंचित, बहुजन ,विकासापासून दूर आहे त्यांना विकासाच्या प्रवाहात आणण्यासाठी कायद्याचा आधार देवून सर्वांगीण विकास करण्याचा प्रयत्न संविधानाच्या माध्यमातून केला.
संविधानाने विधानमंडळ ,विधान भवन, निवडणूक आयोग याबरोबरच राज्य सरकार ,प्रत्येक प्रशासकीय पद , त्याचे अधिकार आणि कर्तव्य यांना आपल्या अधिकारांची चौकट देऊन यामध्ये समाजहित साधण्यासाठी काम करण्याचे सुचित केले आहे.मानवी दृष्टिकोन आणि न्याय भूमिका घेऊन समानतेसाठी संविधान निर्माण केले. हे संविधान गावातील प्रत्येक घरात पोहोचणे आवश्यक आहे, ते गावात ,घरात जाईल तेव्हा व्यक्तीच्या हक्क आणि कर्तव्य याबाबतचा अंगीकार होईल. सामाजिक न्याय खऱ्या अर्थाने प्रस्थापित होईल. यासाठी प्रत्येकाने घराघरात संविधान पोहोचवण्यासाठी राज्यघटनेचे दूत व्हावे असे आवाहन संविधान दिनाच्या कार्यक्रमात डॉ . गोऱ्हे यांनी केले.
सामाजिक न्यायमंत्री संजय शिरसाट म्हणाले की, डॉ. बाबासाहेब आंबेडकर यांनी भारत देशाला दिलेले संविधान आणि लोकशाही ही पद्धती मोठे उपकार आहेत. प्रत्येकाला आपले मत नोंदवण्याचा समान अधिकार असून सर्वांना मतदानाचा अधिकार त्याबरोबरच कर्तव्य आणि अधिकाराची मर्यादा ही संविधानच्या चौकटीत दिले. कोणालाही कोणाचेही जीवन हस्तक्षेप आणि अडचणीचे करण्याचा अधिकार राहिलेला नाही. भारतीय लोकशाही पद्धतीमध्ये भारतीय संविधानाने दिलेल्या कर्तव्याची जाणीव ठेवून काम करणे हाच खरा अर्थाने डॉ. बाबासाहेब आंबेडकर यांच्या संविधान बाबत केलेल्या कार्याचा गौरव आहे. डॉ.बाबासाहेब आंबेडकर आणि शिक्षणाच्या बाबतीत पीपल्स एज्युकेशन सोसायटीच्या माध्यमातून गोरगरीब विद्यार्थ्यांना शिक्षणाच्या प्रवाहात आणले. त्याचबरोबर शिक्षण, समानता, सामाजिक न्याय यासाठी संविधानाचा प्रचार आणि प्रसार करण्याची जबाबदारी सर्वांची असून यामध्ये वंचित राहिलेल्या समाज बांधवांना मुख्य प्रवाहात आणण्यासाठी संविधान विषयक जाणीव जागृतीचे कार्यक्रम राज्यभर घेण्यात येणार असल्याचेही यावेळी मंत्री शिरसाट यांनी सांगितले.
मान्यवरांच्या उपस्थितीत पुणे येथील डॉ बाबासाहेब आंबेडकर संशोधन व प्रशिक्षण संस्था, बार्टीच्या कार्यालयातील भारतीय संविधानाच्या प्रस्ताविकाची कोनशीलाचे अनावरण ऑनलाइन पद्धतीने करण्यात आले.
कार्यक्रमाच्या प्रस्ताविकात समाज कल्याण विभागाच्या आयुक्त दीपा मुधोळ यांनी संविधान दिनाच्या निमित्ताने 26 नोव्हेंबर ते 26 जानेवारी या कालावधीमध्ये घर घर संविधान, त्याचप्रमाणे संविधानाविषयी जाणीव जागृती, उद्देशिकेचे वाचन, विविध स्पर्धा, आणि उपक्रम राबविण्यात येणार असल्याचे सांगितले .
कार्यक्रमाच्या सुरुवातीला संविधानाच्या उद्देशिकेचे सामूहिक वाचन करण्यात आले, वंदे मातरम व राज्य गीताच्या गायनाने कार्यक्रमाची सुरुवात करण्यात आली. कुणाल वराळे यांच्या संगीतमंचाने उपस्थित विद्यार्थी, नागरिक यांना डॉ. बाबासाहेब आंबेडकर यांच्या जीवन ,कार्य आणि भारतीय संविधानाचे महत्त्व पटवून देणारा विविध गीताचा कार्यक्रम सादर करण्यात आला . स्मार्ट सिटीचे उपायुक्त रवींद्र जोगदंड यांनी भारतीय संविधानची निर्मिती त्यामध्ये असणाऱ्या विविध घटकांचा समावेश तसेच इतर घटना, प्रसंगाच्या माध्यमातून विद्यार्थ्यांना संविधान आणि डॉ.बाबासाहेब आंबेडकर यांच्या कार्याची माहिती दिली. कार्यक्रमाचे सूत्रसंचालन मीनाक्षी बालकमल यांनी केले.
What's Your Reaction?
