रोहित पठारे यांच्या निर्घृण हत्येमुळे वैजापूर हादरले, आरोपींवर कठोर कारवाई साठी विविध पक्ष अक्रामक...

रोहित पठारे हत्या प्रकरणाने वैजापूर हादरले; आरोपींवर कठोर कारवाईसाठी विविध पक्ष आक्रमक...

कुटुंबीयांचा पोलीस ठाण्यासमोर आत्मदहनाचा प्रयत्न; आरोपींना न्यायालयात नेताना गोंधळ, राजकीय पदाधिकाऱ्यांनी घेतली कुटुंबीयांची भेट...

वैजापूर, दि.7 (डि-24 न्यूज) :- वैजापूर शहरातील रोहित पठारे हत्या प्रकरणामुळे संपूर्ण परिसरात संतापाचे वातावरण निर्माण झाले आहे. जुन्या वादातून रोहित पठारे या तरुणावर तलवार, लोखंडी रॉड आणि कुऱ्हाडीने हल्ला करण्यात आल्याची धक्कादायक घटना 31 ऑक्टोबर रोजी येवला रोड परिसरात घडली होती. या हल्ल्यात गंभीर जखमी झालेल्या रोहितचा 3 नोव्हेंबर रोजी उपचारादरम्यान मृत्यू झाला. या घटनेनंतर संतप्त नातेवाईक आणि भीमसैनिकांनी आरोपींना कठोर शिक्षा देण्याच्या मागणीसाठी आंदोलन छेडले.

रोहितच्या मृत्यूची बातमी समोर येताच नातेवाईकांनी वैजापूर पोलीस ठाण्यासमोर ठिय्या आंदोलन सुरू केले. यावेळी एका आंदोलकाने आत्मदहनाचा प्रयत्न केल्याने परिसरात खळबळ उडाली. पोलिसांनी वेळीच हस्तक्षेप केल्याने अनर्थ टळला. त्यानंतर डॉ. बाबासाहेब आंबेडकर स्मारक परिसरात संतप्त नागरिकांनी सुमारे चार तास रास्ता रोको आंदोलन केले. आरोपींना तात्काळ अटक करून कठोर शिक्षा देण्याची मागणी यावेळी करण्यात आली.

या प्रकरणात पोलिसांच्या भूमिकेवरही कुटुंबीयांनी गंभीर प्रश्न उपस्थित केले. सुरुवातीला तक्रार नोंदवून घेण्यास टाळाटाळ करण्यात आली तसेच आरोपींना पाठीशी घालण्यात आल्याचा आरोप नातेवाईकांनी केला. या पार्श्वभूमीवर पालकमंत्री संजय शिरसाट यांनी पीडित कुटुंबीयांची भेट घेऊन त्यांचे सांत्वन केले. कुटुंबीयांचे म्हणणे ऐकून घेतल्यानंतर त्यांनी पोलीस तपासाबाबत नाराजी व्यक्त केली. प्रकरणाचा तपास वरिष्ठ पोलीस अधिकाऱ्यांकडे सोपवण्याचे निर्देश देतानाच सामाजिक न्याय विभागाच्या माध्यमातून पीडित कुटुंबाला पाच लाख रुपयांची आर्थिक मदत देण्याची घोषणा केली.

दरम्यान, या प्रकरणात पोलिसांनी तीन आरोपींना ताब्यात घेतले असून अन्य फरार आरोपींचा शोध सुरू आहे. ताब्यात घेतलेल्या आरोपींना न्यायालयात हजर करण्यासाठी नेत असताना संतप्त जमावाने आरोपींच्या दिशेने धाव घेण्याचा प्रयत्न केला. त्यामुळे न्यायालय परिसरात काही काळ गोंधळाचे वातावरण निर्माण झाले. परिस्थिती नियंत्रणात ठेवण्यासाठी पोलिसांनी बंदोबस्त वाढवला आहे.

विविध राजकीय पक्षांच्या पदाधिकाऱ्यांची पीडित कुटुंबीयांना भेट

रोहित पठारे हत्या प्रकरणाचा सर्व स्तरांतून निषेध व्यक्त होत असताना वंचित बहुजन आघाडी, इस्लाम पार्टी आणि समाजवादी पक्षाच्या पदाधिकाऱ्यांनी रोहित यांच्या निवासस्थानी जाऊन कुटुंबीयांची भेट घेतली. यावेळी त्यांनी कुटुंबीयांचे सांत्वन करून न्याय मिळवून देण्यासाठी त्यांच्या पाठीशी ठामपणे उभे राहण्याची भूमिका व्यक्त केली.

या भेटीदरम्यान वंचित बहुजन आघाडीचे गटनेते अफसर पठाण, इस्लाम पार्टीचे शहराध्यक्ष रफत यार खान, युवा नेते अबू हसन, इस्लाम पार्टीचे प्रवक्ते आरिफ हुसैनी, औरंगाबाद जिल्हा सचिव नदीम राणा, औरंगाबाद शहर सचिव शेख सत्तार रशीद, समाजवादी पक्षाचे पदाधिकारी ईसा यासीन, अशरफ अफसर खान आणि रेहान राणा उपस्थित होते.

पोलीस निरीक्षकांची भेट घेऊन कठोर कारवाईची मागणी

कुटुंबीयांची भेट घेतल्यानंतर सर्व पदाधिकाऱ्यांनी वैजापूर पोलीस ठाण्यात जाऊन पोलीस निरीक्षकांची भेट घेतली. रोहित पठारे हत्या प्रकरणातील सर्व आरोपींविरुद्ध कठोर कायदेशीर कारवाई करावी, प्रकरणाचा सखोल आणि निष्पक्ष तपास करावा तसेच दोषींना कायद्यानुसार कठोर शिक्षा मिळावी, अशी मागणी त्यांनी केली.

गंभीर गुन्ह्यांमध्ये पोलिसांनी कोणताही विलंब न करता निष्पक्षपणे कारवाई करणे आवश्यक असल्याचे पदाधिकाऱ्यांनी यावेळी स्पष्ट केले. तसेच तपासाला गती देऊन पीडित कुटुंबाला न्याय मिळवून देण्यासाठी सातत्याने पाठपुरावा करण्याचा निर्धारही व्यक्त केला.

रोहित पठारे यांच्या मृत्यूमुळे त्यांच्या कुटुंबावर दुःखाचा डोंगर कोसळला असून, या प्रकरणातील सर्व आरोपींवर कठोर कारवाई होईपर्यंत पाठपुरावा सुरू ठेवणार असल्याचे राजकीय पदाधिकाऱ्यांनी सांगितले. या प्रकरणाचा पुढील तपास, पोलिसांची कारवाई आणि पीडित कुटुंबाला न्याय मिळण्याच्या प्रक्रियेकडे आता वैजापूरकरांचे लक्ष

लागले आहे.