रन फॉर युनिटी उपक्रमातून दिला राष्ट्रीय एकात्मतेचा संदेश...

नांदेड विभागात राष्ट्रीय एकता दिवस उत्साहात साजरा

‘रन फॉर युनिटी’ उपक्रमातून राष्ट्रीय एकात्मतेचा संदेश

नांदेड, दि.31(डि-24 न्यूज)- 

भारताचे लोहपुरुष सरदार वल्लभभाई पटेल यांच्या जयंतीनिमित्त 31 ऑक्टोबर 2026 रोजी दक्षिण मध्य रेल्वेच्या नांदेड विभागात राष्ट्रीय एकता दिवस उत्साहात साजरा करण्यात आला. यानिमित्ताने नांदेड येथे ‘रन फॉर युनिटी’ या एकता दौडचे आयोजन करण्यात आले.

या कार्यक्रमाला नांदेड विभागाचे मंडळ रेल्वे व्यवस्थापक श्री प्रदीप कामले प्रमुख पाहुणे म्हणून उपस्थित होते. त्यांच्या हस्ते रेल्वे अधिकारी आणि कर्मचाऱ्यांना राष्ट्रीय एकता शपथ देण्यात आली. यावेळी देशाची एकता, अखंडता आणि सुरक्षितता जपण्याची तसेच राष्ट्रीय एकात्मतेची भावना अधिक दृढ करण्याची प्रतिज्ञा घेण्यात आली.

या एकता दौडमध्ये अतिरिक्त मंडळ रेल्वे व्यवस्थापक श्री सीएच कल्याण राजू, मुख्य वैद्यकीय अधीक्षक डॉ. एम. श्रीनिवास तसेच विविध विभागांचे शाखाधिकारी आणि रेल्वे कर्मचारी मोठ्या उत्साहाने सहभागी झाले.

सरदार वल्लभभाई पटेल यांनी देशाच्या एकात्मतेसाठी दिलेल्या योगदानाचे स्मरण करून त्यांच्या विचारांचा आणि आदर्शांचा प्रसार करणे हा या उपक्रमाचा मुख्य उद्देश होता. या कार्यक्रमाच्या माध्यमातून राष्ट्रीय एकात्मता, बंधुभाव, सामाजिक सलोखा आणि देशाप्रती कर्तव्यभावना जोपासण्याचा संदेश देण्यात आला.

या उपक्रमाद्वारे नांदेड विभागाने राष्ट्रीय एकता, अखंडता आणि देशसेवेच्या भावनेप्रती आपली कटिबद्धता पुन्हा एकदा अधोरेखित केली.