मोदी चाॅकलेट वाटप करुन पंतप्रधानांचा उपहासात्मक वाढदिवस साजरा, मेलोडीला नागरीकांची पसंती...

‘मोदी’ चॉकलेट वाटून पंतप्रधानांचा उपहासात्मक वाढदिवस; ‘मेलोडी’ला नागरिकांची पसंती

‘अच्छे दिन’पासून ‘15 लाखां’पर्यंत… रिपब्लिकन सेनेचे ‘मोदी चॉकलेट’ आंदोलन

‘आत्मनिर्भर भारत’च्या नावाने ‘मेलोडी’ चॉकलेट; रिपब्लिकन सेनेचा मोदींच्या वाढदिवशी उपरोधिक निषेध

अच्छे दिन, 15 लाख, रोजगार, स्वस्त इंधन आणि शेतमालाच्या हमीभावाच्या मुद्द्यांवर रिपब्लिकन सेनेचा उपरोधिक निषेध

छत्रपती संभाजीनगर (औरंगाबाद), दि.17(डि-24 न्यूज) - पंतप्रधान नरेंद्र मोदी यांच्या वाढदिवसानिमित्त रिपब्लिकन सेनेच्या वतीने छत्रपती संभाजीनगर शहरातील पैठण गेट येथे गुरुवारी सायंकाळी 6 वाजता अनोख्या आणि उपरोधिक पद्धतीने निषेध आंदोलन करण्यात आले. ‘मोदी चॉकलेट’ आणि ‘मेलोडी चॉकलेट’चे वाटप करत मोदी सरकारच्या आश्वासनांची आठवण करून देण्यात आली.

आंदोलनादरम्यान ‘मोदी चॉकलेट’च्या माध्यमातून ‘अच्छे दिन’, 15 लाख रुपये, प्रतिवर्षी 2 कोटी रोजगार, स्वस्त इंधन, प्रत्येकाला स्वस्त गॅस, शेतमालाला हमीभाव, कर्जमाफी आदी मुद्द्यांचा उल्लेख करण्यात आला. 

या आश्वासनांबाबत नागरिकांमध्ये निर्माण झालेल्या अपेक्षा आणि त्यानंतरच्या अनुभवांकडे लक्ष वेधण्यासाठी चॉकलेट वाटपाचे उपरोधिक वाटप करण्यात आले.

विशेष बाब म्हणून ‘आत्मनिर्भर भारत’ या नावाने ‘मेलोडी’ चॉकलेटचेही वाटप करण्यात आले. ‘मोदी’ आणि ‘मेलोडी’ या शब्दांतील साम्याचा आधार घेत आंदोलनकर्त्यांनी सरकारच्या घोषणांवर आणि आश्वासनांवर उपरोधिक भाष्य केले.

रिपब्लिकन सेनेच्या पदाधिकारी व कार्यकर्त्यांनी यावेळी नागरिकांशी संवाद साधत केंद्र सरकारच्या विविध घोषणा, आश्वासने आणि त्यांची अंमलबजावणी याबाबत प्रश्न उपस्थित केले. वाढती महागाई, रोजगाराच्या संधी, इंधनाचे दर, घरगुती गॅस, शेतमालाचे भाव आणि शेतकरी प्रश्न याकडे सरकारने गांभीर्याने लक्ष द्यावे, अशी भूमिका आंदोलनकर्त्यांनी मांडली.

‘मोदी चॉकलेट’पेक्षा नागरिकांनी ‘मेलोडी’ चॉकलेटला अधिक पसंती दिली. चॉकलेट वाटपादरम्यान नागरिकांनी विविध प्रतिक्रिया व्यक्त करत सरकारकडून करण्यात आलेल्या घोषणांबाबत अपेक्षा पूर्ण झाल्या नसल्याची नाराजी व्यक्त केली व पुन्हा मोदी नको अश्या प्रतिक्रिया दिल्या ईव्हीएम च्या जीवावर मोदी निवडून येतात असा टोलाही नागरिकांनी लगावला.

यावेळी नागरिकांशी संवाद साधताना “आश्वासनांची आठवण करून देण्यासाठी हे चॉकलेट वाटप असून, जनतेला केवळ घोषणा नकोत तर प्रत्यक्ष परिणाम हवेत,” अशी भूमिका रिपब्लिकन सेनेच्या वतीने मांडण्यात आली.

दरम्यान, पंतप्रधान नरेंद्र मोदी यांचा 76वा वाढदिवस 17 सप्टेंबर रोजी देशभर विविध कार्यक्रमांनी साजरा करण्यात आला. रिपब्लिकन सेनेने मात्र याच दिवशी उपरोधिक चॉकलेट वाटपाच्या माध्यमातून सरकारच्या धोरणांवर आणि आश्वासनांवर प्रश्न उपस्थित करत आपला निषेध नोंदविला.

यावेळी के व्ही मोरे, सचिन निकम, मिलिंद मोकळे, सुनील पांडे, अजय बनसोडे, राहुल गवळी, राष्ट्रपाल गवई, बाळू गायकवाड, अतुल चव्हाण, सचिन शिंगाडे, राजू मगरे, अनिल खरात, आकाश पंडित, अमोल तुपे आदींनी

आंदोलनात सहभाग घेतला.