रक्तदान करून शहिदांचे स्मरण - उपसभापती सचिन अहिर
रक्तदान शिबिरात 325 हून अधिक जणांचा सहभाग...
रक्तदान करुन करा शहिदांचे स्मरण- उपसभापती सचिन अहिर
रक्तदान शिबीर हा महत्त्वपूर्ण सामाजिक उपक्रम- पालकमंत्री संजय शिरसाट
छत्रपती संभाजीनगर (औरंगाबाद), दि.22(डि-24 न्यूज)- मुंबई येथे 26 नोव्हेंबर 2008 रोजी झालेल्या दहशतवादी हल्ल्यात शहीद झालेल्या वीरांच्या स्मरणार्थ आज येथे शासकीय रक्तपेढी घाटी रुग्णालय यांच्यावतीने रक्तदान शिबिराचे आयोजन करण्यात आले. वीरांच्या स्मरणार्थ प्रत्येक जिल्ह्यात रक्तदान शिबिराचे आयोजन करावे, अशी अपेक्षा विधान परिषदेचे उपसभापती सचिन अहिर यांनी व्यक्त केली. राज्याचे सामाजिक न्याय मंत्री तथा जिल्ह्याचे पालकमंत्री संजय शिरसाट यांनीही या शिबिरास भेट देऊन रक्तदात्यांच्या उत्साह वाढविला.
सचिन भाऊ अहिर यूथ फाउंडेशनच्या वतीने येथील सिडको परिसरात कालिका माता मंदिर येथे रक्तदान शिबिराचे आयोजन करण्यात आले. दहशतवादी हल्ल्यात शहीद झालेल्या वीरांच्या स्मरणार्थ हे शिबीर आयोजीत करण्यात आले होते. दुपारी दोन वाजेपर्यंत 325 हून अधिक रक्तदात्यांनी रक्तदान केले. या शिबिरास आज उपसभापती सचिन अहिर आणि पालकमंत्री संजय शिरसाट यांणी भेट दिली. मान्यवरांच्या हस्ते रक्तदात्यांना प्रमाणपत्र प्रदान करण्यात आले.
शासकीय वैद्यकीय महाविद्यालय व रुग्णालयाच्या रक्तपेढीमार्फत शिबिरात रक्तसंकलन करण्यात आले. रक्तसंकलनासाठी योगदान देणाऱ्या अधिकारी आणि कर्मचाऱ्यांचा मान्यवरांच्या हस्ते सन्मान करण्यात आला.
पालकमंत्री शिरसाट म्हणाले की, रक्तदान शिबीर हा महत्त्वपूर्ण सामाजिक उपक्रम आहे. आयोजकांनी या उपक्रमाचे यशस्वी आयोजन केले असून, त्याला नागरिकांनी दिलेला उत्स्फूर्त प्रतिसाद समाधानकारक आहे, असे प्रतिपादन सामाजिक न्याय मंत्री तथा छत्रपती संभाजीनगर जिल्ह्याचे पालकमंत्री संजय शिरसाट यांनी केले. भविष्यातही सचिन अहिर यूथ फाउंडेशनच्या माध्यमातून विविध सामाजिक उपक्रम राबविण्यात यावेत, अशी अपेक्षाही त्यांनी व्यक्त केली.
या शिबिरात रक्तदान करणाऱ्या प्रत्येक रक्तदात्याला फाउंडेशनच्या वतीने एक रोपटे भेट देण्यात आले. शासकीय व निमशासकीय विभागांतील अधिकारी-कर्मचारी, विविध सामाजिक संघटनांचे पदाधिकारी, कोषागार विभागाचे अधिकारी व कर्मचारी, रेल्वे विभागाचे कर्मचारी, राज्य राखीव पोलीस दलाचे जवान तसेच शिक्षक संघटनांच्या प्रतिनिधींनी या उपक्रमात सहभाग घेतला. या कार्यक्रमास विविध क्षेत्रातील राजकीय, सामाजिक कार्यकर्ते यांची उपस्थिती होती. तसेच विविध रक्तदात्यांनी या उपक्रमात सहभाग
नोंदविला.
What's Your Reaction?