"स्वच्छता ही सेवा" एक दिन एक घंटा एक साथ" अभियान अंतर्गत नांदेड विभागात भव्य श्रमदान मोहीम...

“स्वच्छता ही सेवा” एक दिन एक घंटा एक साथ अभियानांतर्गत नांदेड विभागात भव्य श्रमदान मोहीम

नांदेड, दि.25(डि-24 न्यूज) -

स्वच्छता ही सेवा अभियानाचा एक भाग म्हणून नांदेड विभागात 47 ठिकाणी भव्य श्रमदान मोहीम राबविण्यात आली. या उपक्रमामध्ये 697 पेक्षा अधिक अधिकारी, कर्मचारी, स्वयंसेवी संस्था व स्थानिक नागरिकांनी उत्साहाने भाग घेतला आणि स्वच्छता व स्वास्थ संवर्धनासाठी एकत्रितपणे कार्य केले.

ही श्रमदान मोहीम नांदेड, पुर्णा, परभणी, अकोला, बोल्ड, जालना, औरंगाबाद, नागरसोल, सहस्त्रकुंड, थेरबन, रोटेगाव, रंजनई, नांदापूर, तारूर, कतरोड, दिनगाव, हिंगोली, कोडी, अमनवाडी, भोकर, बदनापूर तसेच विभागातील इतर अनेक स्थानकांवर व वसाहतींमध्ये आयोजित करण्यात आली.

मोहीमेअंतर्गत प्लास्टिक कचऱ्याची विल्हेवाट, स्टेशन परिसरांची स्वच्छता, वृक्षारोपण, वसाहती व नाल्यांची साफसफाई, तसेच सार्वजनिक ठिकाणांवरील कचऱ्याचे संकलन व व्यवस्थापन करण्यात आले. तसेच, एकदाच वापरल्या जाणाऱ्या प्लास्टिकचा वापर टाळणे, पर्यावरणपूरक पद्धती अवलंबणे व नागरिक आणि प्रवाशांनी सामूहिक जबाबदारी स्वीकारणे याबाबत जनजागृती करण्यात आली.

नांदेड येथे मंडल रेल्वे व्यवस्थापक (DRM) श्री प्रदीप कामले यांनी स्वतः मंडल कार्यालय संकुलात (DOC) श्रमदानात सहभागी होऊन वरिष्ठ अधिकारी, कर्मचारी व स्वयंसेवी संस्थांसोबत काम केले. त्यांच्या उपस्थितीने सर्वांना प्रोत्साहन मिळाले.

या प्रसंगी मंडल रेल्वे व्यवस्थापक श्री प्रदीप कामले यांनी सांगितले –

“स्वच्छता ही एकदाच होणारी कृती नसून ती सततची जबाबदारी आहे. अशा श्रमदान उपक्रमांद्वारे आपण परिसर स्वच्छ ठेवण्यासोबत समाजात स्वच्छतेची संस्कृतीही रुजवतो.”

या उपक्रमात नागरिक कृती समिती व प्लॉगर्स ग्रुप, नांदेड या दोन स्वयंसेवी संस्थांनी DRM कार्यालयात #EkDinEkGhantaEkSaath या देशव्यापी अभियानात सहभाग नोंदविला.

कार्यक्रमाचा समारोप सर्व सहभागींच्या स्वच्छता शपथेने झाला, ज्यामध्ये रेल्वे परिसर स्वच्छ व हरित ठेवण्याचा निर्धार व्यक्त करण्यात आला. यामुळे भारतीय रेल्वेला स्वच्छता व प्रवासी समाधानाचे आदर्श ठरविण्याचे ध्येय अधिक बळकट झाले.