पोलिस दलात निवडणूक आयोगाचे निर्देश डावलून बदल्या...! आदेशाची अंमलबजावणी कधी

पोलिस दलात निवडणूक आयोगाचे निर्देश डावलून बदल्या!

केंद्रीय निवडणूक आयोगाचे निर्देश धाब्यावर, आदेशाची अंमलबजावणी कधी...

औरंगाबाद, दि.23(डि-24 न्यूज ) लोकसभा निवडणुका 2024 च्या अनुषंगाने पोलिस, महसूल, अन्य शासकीय विभागातील कार्यालयातील अधिका-यांच्या बदल्या करण्यात आल्या. निवडणुकीशी प्रत्यक्ष संबंध असलेल्या पोलिस अधिका-यांना तीन वर्ष व त्यापेक्षा अधिकचा कालावधी एका ठिकाणी झालेला असेल त्यांची बदली दुस-या जिल्ह्यात बदली करावी असे निवडणूक आयोगाचे निर्देश आहेत. मात्र, शहर पोलिस दलात सर्व नियम धाब्यावर बसवून पाच वर्षापेक्षा जास्त कार्यरत असलेल्या अधिका-यांच्या बदल्या करण्यात आल्या नाही. अशी धक्कादायक माहिती समोर आली आहे.

शहर पोलिस दलात मर्जीतील अधिका-यांना पाच वर्षापेक्षा जास्त कालावधी उलटून सुध्दा त्यांची बदली करण्यात आली नाही. त्या अधिका-यांना कुणाचा आशीर्वाद आहे याची कुजबूज सुरु झाली आहे. विशेष म्हणजे गुन्हे शाखेचे पोलिस निरीक्षक संदीप गुरमे, संभाजी पवार, अविनाश आघाव, ब्रम्हा गिरी, जनार्दन साळुंके या अधिका-यांचा कार्यकाळ चार वर्षापेक्षा जास्त झाला आहे. तरी सुध्दा या अधिका-यांची बदल झाली नाही. या अधिका-यांवर एवढी मेहरनजर कुणाची... ? अशीही चर्चा शहर पोलिस दलात सुरु आहे. मर्जीतल्या अधिका-यांसाठी व इतर अधिका-यांसाठी नियम वेगळे का अशीही चर्चा जोरात सुरु आहे.    

आयोगाने घेतली दखल तरीही...

लोकसभा निवडणुकीच्या दृष्टीकोनातून पोलिस दलात अधिका-यांच्या बदल्या करताना केंद्रीय निवडणूक आयोगाचे निर्देश धाब्यावर बसविण्यात आले. त्याची दखल महाराष्ट्र प्रशासनिक लवाद (मॅट) आणि आयोगानेही घेतली आहे. आयोगाने याबाबतचा अहवाल पोलिस महासंचालक कार्यालयाकडून मागविला आहे हे विशेष.