भाजपा विरोधी भूमिका मांडणा-या सिजेपी नेते अभिजित दिपके यांच्या घरी बच्चू कडू, राजकीय चर्चांना उधाण...!

भाजपविरोधी भूमिका मांडणाऱ्या CJP नेते अभिजित दिपके यांच्या घरी बच्चू कडूंची भेट; राजकीय चर्चांना उधाण

छत्रपती संभाजीनगर (औरंगाबाद), दि.30 (डि-24 न्यूज) - राज्यातील राजकीय घडामोडींना वेग आला असताना, शिवसेना (शिंदे गट)चे नेते तथा आमदार बच्चू कडू यांनी CJP चे नेते अभिजित दिपके यांच्या निवासस्थानी जाऊन त्यांची भेट घेतल्याने राजकीय वर्तुळात विविध चर्चांना उधाण आले आहे. भाजपविरोधी भूमिका सातत्याने मांडणाऱ्या CJP नेतृत्वाशी शिंदे गटातील वरिष्ठ नेत्याची झालेली ही भेट महायुतीतील राजकीय समीकरणांच्या पार्श्वभूमीवर चर्चेचा विषय ठरत आहे.

महायुतीतील प्रमुख घटक पक्ष असलेल्या भाजपविरोधात भूमिका घेणाऱ्या नेत्याची शिंदे गटातील महत्त्वाच्या नेत्याने भेट घेतल्याने या भेटीचे विविध अर्थ लावले जात आहेत. राजकीय विश्लेषकांच्या मते, एका बाजूला उपमुख्यमंत्री एकनाथ शिंदे हे पंतप्रधान नरेंद्र मोदी यांच्या नेतृत्वाला पाठिंबा देत असताना, दुसऱ्या बाजूला आमदार बच्चू कडू यांनी अभिजित दिपके यांची घेतलेली भेट हा वेगळा राजकीय संदेश मानला जात आहे.

यापूर्वी काही दिवसांपूर्वी राज्याचे सामाजिक न्याय मंत्री तथा जिल्ह्याचे पालकमंत्री संजय शिरसाट यांनीही अभिजित दिपके यांच्या निवासस्थानी भेट दिली होती. त्यानंतर आता बच्चू कडू यांनीही दिपके यांची भेट घेतल्याने या घडामोडींना अधिक महत्त्व प्राप्त झाले आहे.

बच्चू कडू यांनी आपल्या प्रहार जनशक्ती पक्षाचे शिवसेनेत विलिनीकरण केल्यानंतर त्यांना विधानपरिषदेवर आमदार म्हणून संधी मिळाली. त्यामुळे शिंदे गटातील प्रभावी नेत्यांमध्ये त्यांची गणना केली जाते. आपल्या आक्रमक आंदोलनशैलीसाठी ओळख असलेल्या बच्चू कडू यांच्या या भेटीमागे नेमका उद्देश काय, याबाबत राजकीय वर्तुळात विविध तर्क-वितर्क व्यक्त केले जात आहेत. मात्र, या भेटीबाबत कोणतीही अधिकृत राजकीय भूमिका अद्याप समोर आलेली नाही.

या भेटीप्रसंगी शहराध्यक्ष कुणाल राऊत, महेश बडे, सुधाकर शिंदे, संकेत खापर्डे, विश्वदीप कारंजीकर आणि जुबेर शेख उपस्थित होते.

बच्चू कडू यांचे स्पष्टीकरण

या भेटीबाबत प्रतिक्रिया देताना आमदार बच्चू कडू म्हणाले, "मी शेतकरी, दिव्यांग आणि विद्यार्थ्यांच्या प्रश्नांसाठी अनेक आंदोलने केली आहेत. या आंदोलनांदरम्यान माझ्यावर अनेक वेळा लाठीमार झाला असून आजपर्यंत माझ्याविरुद्ध साडेतीनशेहून अधिक गुन्हे दाखल झाले आहेत. मी स्वतःला एक आंदोलक मानतो. सामान्य कार्यकर्त्यांच्या भावना समजून घेणारा कार्यकर्ता म्हणून वैयक्तिक पातळीवर अभिजित दिपके यांची भेट घेऊन त्यांचे अभिनंदन करण्यासाठी आलो होतो."