महापालिका निवडणुकीची जय्यत तयारी, 1267 मतदान केंद्रासाठी 5588 पोलिंग कर्मचारी...

मनपा सार्वत्रिक निवडणूक 2025–26 : प्रशासनाची जय्यत तयारी

1267 मतदान केंद्रांसाठी 5588 पोलिंग कर्मचाऱ्यांची नियुक्ती, 537 ठिकाणी वेबकास्टिंग व्यवस्था

छत्रपती संभाजीनगर, दि.13(डि-24 न्यूज)-

छत्रपती संभाजीनगर महानगरपालिकेच्या सार्वत्रिक निवडणूक 2025–26 साठी बुधवार, दि. 15 जानेवारी रोजी मतदान प्रक्रिया पार पडणार असून, ही प्रक्रिया निर्भीड, शांततापूर्ण व पारदर्शक पद्धतीने पार पडावी यासाठी महानगरपालिका प्रशासनातर्फे सर्वसमावेशक आणि काटेकोर तयारी करण्यात आली आहे.

मतदान केंद्र व मनुष्यबळ व्यवस्था

शहरातील एकूण 1267 मतदान केंद्रांवर मतदान प्रक्रिया राबविण्यात येणार असून, यासाठी एकूण 5588 मतदान केंद्राध्यक्ष व पोलिंग अधिकारी (पोलिंग ऑफिसर क्रमांक 1 ते 3) यांची नियुक्ती करण्यात आली आहे. सर्व कर्मचाऱ्यांना आवश्यक प्रशिक्षण देण्यात आले असून मतदानाच्या दिवशी कोणतीही अडचण येऊ नये यासाठी पर्यायी व्यवस्था देखील सज्ज ठेवण्यात आली आहे.

मतदार व उमेदवारांची संख्या

या निवडणुकीत एकूण 11,17,477 मतदार आपला मतदानाचा हक्क बजावणार आहेत. तसेच, विविध राजकीय पक्ष व अपक्ष मिळून एकूण 859 उमेदवार निवडणूक रिंगणात आहेत.

वेबकास्टिंग व निवडणूक निरीक्षण

मतदान प्रक्रिया अधिक पारदर्शक व विश्वासार्ह राहावी यासाठी 537 मतदान केंद्रांवर मतदान कक्षाच्या आत व बाहेर वेबकास्टिंग कॅमेरे बसविण्यात आले आहेत. याशिवाय निवडणूक कामकाजावर देखरेख ठेवण्यासाठी 173 क्षेत्रीय अधिकाऱ्यांची नियुक्ती करण्यात आली आहे.

स्ट्रॉंग रूम व मतमोजणी केंद्रे

मतदानानंतर ईव्हीएम यंत्रे सुरक्षित ठेवण्यासाठी व मतमोजणीसाठी शहरात चार स्ट्रॉंग रूम व मतमोजणी केंद्रे निश्चित करण्यात आली आहेत. त्यामध्ये पुढील ठिकाणांचा समावेश आहे:

शासकीय अभियांत्रिकी महाविद्यालय, उस्मानपुरा

शासकीय तंत्रनिकेतन महाविद्यालय, स्टेशन रोड

एस. एफ. एस. शाळा, जालना रोड

गरवारे आयटी पार्क, चिकलठाणा एमआयडीसी

प्रशासनाचा संदेश

महानगरपालिका प्रशासनातर्फे मतदारांना निर्भयपणे मतदान करण्याचे आवाहन करण्यात आले असून, कायदा व सुव्यवस्था राखण्यासाठी पोलीस प्रशासनासह समन्वय साधण्यात आला आहे. निवडणूक प्रक्रिया सुरळीत पार पडण्यासाठी सर्व यंत्रणा सज्ज असल्याचे प्रशासनाने स्पष्ट केले आहे.