मंत्री अतुल सावे यांच्या गाडीवर दगडफेक, मनोरुग्ण पोलिसांच्या ताब्यात...

मंत्री अतुल सावे यांच्या वाहनावर दगडफेक करणारा

मनोरुग्ण पोलिसांच्या ताब्यात...

छत्रपती संभाजीनगर (औरंगाबाद), दि.20(डि-24 न्यूज) राज्याचे गृहनिर्माण तथा इतर मागास बहुजन कल्याण मंत्री अतुल सावे यांच्या गाडीवर दगडफेक करण्यात आल्याची घटना आज 20 सप्टेंबर रोजी दुपारी 12 वाजेच्या सुमारास घडली आहे. या घटनेत सावे यांच्या गाडीची काच फुटली आहे. पोलिसांनी या प्रकरणी एका मनोरुग्ण व्यक्तीला ताब्यात घेतले आहे. मराठा आरक्षणामुळे राज्याचे वातावरण तापले असताना ही घटना घडल्यामुळे चिंता व्यक्त केली जात आहे.

पोलिसांनी दिलेल्या माहितीनुसार, गणेश सखाराम शेजूळ, राहणार पुंडलिकनगर, गल्ली नंबर 1 असे पोलिसांच्या ताब्यात असलेल्या मनोरुग्णाचे नाव आहे. मंत्री अतुल सावे यांचे छत्रपती संभाजीनगर शहरात 2 संपर्क कार्यालय आहेत. त्यापैकी सिडको एन-4 पुंडलिक नगर भागातील संपर्क कार्यालयाबाहेर शनिवारी दुपारी 12 वाजेच्या सुमारास त्यांच्या गाडीवर दगडफेक करण्यात आली. ही घटना घडली तेव्हा मंत्री सावे आपल्या संपर्क कार्यालयात भेटण्यासाठी आलेल्या नागरिकांशी संवाद साधत होते. तेव्हा अचानक गणेश शेजूळ याने त्यांच्या गाडीवर दगडफेक केली. त्यात त्यांच्या कारची समोरील काच फुटली. इतर कोणतेही नुकसान झाले नाही. गाडीला दगड फेकून मारल्यानंतर हल्लेखोर शेजूळ याने तेथून पळून जाण्याचा प्रयत्न केला. पण पोलिस व उपस्थितांनी त्याच्या मुसक्या आवळून त्याला पुंडलिकनगर पोलिसांच्या स्वाधीन केले.

गणेश शेजूळ हा मनोरुग्ण असून त्याच्यावर गेल्या 10 ते 12 वर्षापासून उपचार करण्यात येत आहेत. ते नेहमी मंत्री सावे यांच्याकडे उपचारासाठी पैसे मागण्यासाठी येत होते. मंत्री सावे यांनी त्याला पैसे कमी दिल्याच्या रागातून त्याने हे कृत्य केल्याचे पोलिसांना सांगितले. या घटनेची नोंद पुंडलिकनगर पोलिस ठाण्यात करण्यात आली असून रात्री उशिरापर्यंत गुन्हा दाखल करण्याची प्रक्रिया सुरु होती.